Кыдз и мöдiк спектакллез, Коми-Пермяцкöй национальнöй театрын быдса зал öктiс «Кукушечка, кукуй» премьера.
Спектакль висьтасьö «Кукушка» ансамбльлöн медодзза состав йылiсь, кöда олiс Кочёвскöй районiсь Кукушка деревняын.
Быд сьылiсьлöн аслас олан и аслас судьба. Öтiклöн шогмис волькыт да кокнит олан туй, а мöдiклöн – чукыля да гöппеза. И быдыс олö асмоза, синва да шыньöв сорöн, радейтöм понда пессьöмöн. Ансамблись участницаэзлöн быдöнныслöн öтласа шог и öтласа шуд. А меддонанас лоö сьыланкыв, кöда отсалö вунöтны умöльыс йылiсь, кöда отсалö любуйтчыны Россияись да мöдiк странаэзiсь ыджыт каррезöн, ны достопримечательносттезöн.
И быдсöн спектакль коста мортлö висьталöны: тöд, тэ локтiн эта мирö не пыр кежö, этасянь ешты керны, мый тэныт сетöм, мый тэсянь видзчисьö мирыс, мед эз ло сёр.
«Кукуй, кукушечка» быдсöн коми-пермяцкöй кыв вылын. Кин оз тöд чужан кыв, видзöтöны наушниккезöн, нылö вуджöтöны роч кыв вылö. Спектакль вылын уджалiсö: режиссёр да пьесалöн автор Дарья Левингер (Санкт-Петербург), художник Никита Запаскин (Могилёв, Беларусь), композитор Алексей Мусатов, свет сьöртi художник Евгений Козин (Пермь), хормейстер Лариса Клещина, роч кыв вывсянь коми-пермяцкöй вылö вуджöтiс , а сiдзжö вöлi этноконсультантöн театрись актриса Татьяна Савельева.
Премьера вöрзьöтiс сьöлöм, пидзыртiс кортöм синва, сьылöтiс. Видзöтiссез дыр шовкöтiсö артисттэзлö, горöтiсö «браво», козьналiсö дзоридззез. Юралiссез висьталiсö шоныт кыввез. Сiдз, Алексей Плотников, Коми-Пермяцкöй округись юралiсь, ошкис режиссёрöс и артисттэзöс коми-пермяцкöй кыв да культура зорöтöм понда, а Александр Юркин, Кочёвскöй районiсь юралiсь, висьталiс ыджыт спасибо и видзöтiссезлö, кöда коласын уна вöлi локтöмась районiсь. Сэтöн жö благодаритiсö и томыник режиссёрöс. Дарья Левингерлöн шогмис осьтны ассис лов коми-пермяцкöй мулö, сылöн кыв да культуралö, этасянь и премьера пыдына пырис сьöлöммезö, деревнялöн олан йылiсь сказка лоис быльöн. Эта рытö шоныт кыввез да дзоридззез козьналiсö и «Кукушка» ансамбльлöн представителлезлö, веськöтлiсьлö Надежда Ивановна Чугайновалö, кöда уна годдэз ни веськöтлö ансамбльöн.
Конецын ни быдöнныс öтлаын сьылiсö «Кукушкалiсь» сьыланкыввез коласiсь короннöйö – «Кыдзи мийö, томпöлöс».
Кама кытшын