Хабарҷыларнаң тоғазығда «Читiген» театрның чайаачы ӧмезi Пермь крайындағы коми-пермяктар чирiнзер чорығынаңар чоохтап пирген
Пiстiң артисттерiбiс андағы Кудымкар городта 18 – 23 октябрьда ирткен «Сообщение» национальнай театрларның фестивальында араласханнар.
– Пу фестивальны коми-пермяктарның М.Горькийнiң адынаң национальнай театры Пермь крайы губернаторының паза культура министерствозының хабазиинаң чыл сай иртiрче. Пӱӱл аймах тiллiг чайаачы ӧмелер оларзар тӧртiнҷi хати чыылысханнар. «Читiген» театр анда пастағызын на араласты. Прай алты национальнай театр полған, ол санда фестиваль тӧстегҷiзi. Пiс А.Чапрайның «Абахай Пахта» (12+) ойынын кӧзiткебiс. Аның режиссеры якут чирiнiң оолғы Сергей Потапов полча. Чорығыбыстың ӧӧн пӧгiнi наа оңдайнаң, пӱӱнгi кӱнге килiстiре турғызылған ойынға пасха чонның, артисттернiң, театр критиктерiнiң ӱндезiглерiн алып алары полған тиирге чарир. «Сообщение» фестиваль чарғыҷыларның кнезi театровед, искусствовед паза «Алтын маска» театрлар сыйии комиссиязының экспертi Татьяна Тихоновец полған. Паза чарғыҷылар санында Санкт-Петербургтағы театрлар журналының редакторы, театровед Ирина Селезневанаң 2023-2024 чылларда иртер «Алтын маска» театрлар сыйии комиссиязының экспертi, драматург Алексей Исаев полғаннар. Мындағ кiзiлернiң сағыс-кӧрiзiн пiлiп алары піске тың аарлығ, – чооғын пастаан «Читiген» театрның устағҷызы Ирина Чустугешева.
Хайди аннаң андар чарытханнар пресс-конференция араласчылары, «Абахай Пахта» ойынны кӧрiп алған соонда критиктернiң сурығлар кӧп сығыстыр. Оларға ӧӧнiнде хакас чонның оңдай-хылиин пiлiп аларға чапсых полтыр.
– Профессионалларның пiстiң тоғызыбыстаңар сағыс-кӧрiстерiн истiп алары иң ӧӧнi полған. Хайда-да оларнаң чараспинчатхабыс. Олар пiстiң кибiрлерiбiстi, культурабысты ӧтiре пiлбинчелер нооза. Аннаңар талазарға даа килiс парчатхан. Че пiс республикабысты турыстыра кӧзiт пиргебiс тiп сағынчабыс, – теен артист паза режиссер Каскар Чаптыков.
– Паза иң ӧӧнi – ойыныбысты кӧрерге залға чон толдыра чыылысханы! Анзы Кудымкар город чуртағҷылары театрға хынчатханын таныхтапча. Олар пiске тееннер: «Пiс сiрернiң ойыныңарны сағызыбыста ӱр ал чӧрербiс». Мындағ ӱндезiглер пiске тың аарлығ. Хайдағ даа артисттiң ӧӧн критигi кӧрiгҷiлер полча нооза, – чоохха хозылған «Читiген» театрның хоос устағҷызы, Хакасияның чон артизi Валерий Топоев.
Хакасия искусствозының саблығ деятельi Олег Чебодаев коми-пермяктарның паза хакастарның культураларының пик палғалызын iдӧк чахсы сизiнгем тiпче.
«Олар, пiстiң тiлiбiстi пiл полбазалар даа, ойыныбысты чӱрекке чағын алып кӧргеннер тиирге чарир. Полған на сай «Браво!» хысхыр турҷаңнар», – теен чайаачы ус.
Салтарында «Читiген» театрның артисттерiне «Сообщение» национальнай театрларның тӧртiнҷi фестивальында чарғыҷыларның «За слияние традиций и современности» ӧнетiн Дипломы читiрiлген.
Паза хабарҷыларнаң тоғазығ тузында чайаачы устарыбыс Кудымкар городтағы коми-пермяктарның национальнай театрынаңар хысхаҷахти искiргеннер.
– Пӱӱнгi кӱнде ол театрда 150 тоғынҷы саналча, оларның санында 43 актёр. Кӧбiзi РСФСР-ның саблығ артисттерi, амғы чииттерге чахсы кӧзiдiм полчалар. Iдӧк таныхтирға кирек пу театр Пермь крайы устағ-пастааның хайиинда полчатханын. Губернатор анда аймах фестивальлар иртiрерге чахсы полысча. Алынҷа чоохтап пирерге кирек Кудымкар городтаңар. Ол уғаа кiчiг город. Анда олаңай ла чоллар, асфальт пiр дее чирде тӧзелбеен, светофорлар даа пiр дее чоғыл. Аның ӱчӱн кiчiг городта мындағ синнiг фестивальлар иртiрчеткеннерi тың морсымнығ. Пазағы чылда олар пизiнҷi, пайрамнығ, «Сообщение» фестивальны иртiрерге пӧгiнчелер. Пiстi андар хығырғаннарох, – чоохтап пирген устағҷы Ирина Чустугешева.
– Город кiчiг дее полза, оларның коми-пермяк чонының рестораны пар. Анда пiстi национальнай ас-тамахнаң азырааннар. Тиксi чоохтаза, Кудымкарда аалҷыларны чахсы удурлапчалар. Килген чонны хондырҷаң орыннаң на сидiксiнiс сығыс килче. Пу городта пiр ле улуғ нимес аалҷылар туразы, – хоза таныхтааннар пасха артисттер.
Хабарлар